Крис Кристоферсон, влијателниот американски пејач, актер и текстописец со низа хитови, почина во саботата на 88-годишна возраст. Кристоферсон отсекогаш бил отворен за неговата борба со зависноста од алкохолот.
Во интервју за „People“ во 1998 година, Кристоферсон објасни како неговото семејство и желбата да биде со своите најблиски конечно го мотивирале да престане да пие. „Мислев дека сите сериозни уметници се самоуништувачки настроени. Дека секој што вреди да живее, ќе живее на работ“, рече тој тогаш.
Во доцните 1960-ти и раните 1970-ти, тој започна врска со пејачката Џенис Џоплин. „Ми се допаѓаше нејзината смисла за хумор. Тогаш пиев многу… А таа се обидуваше да се откаже од хероинот“, рече тој. Џоплин потоа почина на 27-годишна возраст. „Тоа ме уништи“, се сеќава Кристоферсон, но рече дека сè уште не било доволно за да го убеди да престане да пие. „Кога настапував, не можев да замислам да станам и да го направам тоа без алкохол“, рече тој.
Она што навистина го започна неговото патување до трезвеноста беше улогата во филмот „Ѕвезда е родена“ од 1976 година, во кој глумеше заедно со Барбра Стрејсенд. Според актерот, гледањето на сопствената сцена на смртта во филмот, со лик кој се бори со алкохолот, го натерало да донесе одлука за промена.
„Се сеќавам дека замислував дека може да ми плачат сопругата и децата по моето тело. Престанав да пијам поради тоа. Не сакав да умрам пред ќерка ми да порасне”, рекол тој. Не долго откако се отрезнил, ја запознал својата сопруга Лиза Мејерс во 1982 година. Двојката имаше пет заеднички деца, а Кристоферсон веќе имаше три деца од претходните бракови.
Размислувајќи за неговиот тивок семеен живот и дом на Хаваите во 1998 година, Кристоферсон рече: „Никогаш не можев да го замислам ова. Никогаш не мислев дека ќе доживеам 30 години. Можев да умрам“.