Премиерот Христијан Мицкоски ги дефинираше првите 100 дена од неговата влада како не лесни, но клучни. Мицкоски на прес-конференција, опкружен со министри од Владата, информираше за она што е сработено во првите три месеци од неговата администрација во однос на инвестициите и преземените мерки на економски план, велејќи дека ја затекнал државата во лоша состојба и најави дека започнале реформа на судскиот систем, како и во врска со борбата против корупцијата и криминалот.
Мицкоски најави дека „францускиот предлог“ е „само предлог“, а во Договорот за пријателство и добрососедство со Бугарија не стои дека треба да има измени во Уставот на државата.
Тој како пример го наведе Договорот со Грција каде е факт и евидентирано дека измените во Уставот стапуваат на сила откако ќе се ратификува протоколот за членство на земјата во НАТО. Така, измените во основниот закон за вклучување на Бугарите во него треба да стапат на сила откако Софија ќе го ратификува претпристапниот протокол за членство на Македонија во ЕУ, категоричен е македонскиот премиер.
„Не сме сами, имаме многу пријатели кои се дел од европското семејство. Јас не сум тврдоглав човек, подготвен сум да прифатам аргументи, но досега не слушнав аргументи зошто да не бидеме членки на ЕУ. Затоа, продолжуваме да ги решаваме проблемите на граѓаните, да останеме на патот на ЕУ, да градиме партнерства и пријателства. Не прифаќам диктат и закани“, додаде Мицкоски.
„Ние како Влада никогаш нема да отстапиме од нашата втора стратешка цел, а тоа е полноправно членство во ЕУ и ако треба ќе разговараме со сите, а ако треба ќе разговараме онолку колку што е потребно за да се постигне договор и компромис кој е достоен кој нема повторно да ги повреди чувствата на македонскиот народ, но и на другите кои живеат заедно со него“, потенцира претседателот на Владата.
На прашање поврзано со зборовите на вицепремиерот и министер за животна средина Изет Маџити во интервју во кое тој изрази уверување дека измените на Уставот ќе бидат донесени до крајот на годинава, Мицкоски рече дека во Владата се разговара за секакви теми меѓу кои и евроинтеграциите, но истовремено истакна дека коалицијата е стабилна.
Опозициската СДСМ првите 100 дена на Мицкоски и ВМРО-ДПМНЕ ги оцени како „период на изговори, скандали, разочарувања, неисполнети ветувања и неуспеси“.
„Владата ги прекина преговорите со ЕУ. Одлуката на Мицкоски и ВМРО-ДПМНЕ буквално да ги прекинат преговорите со ЕУ и да ја доведат државата во политички ќорсокак е најголемиот успех на оваа влада во првите 100 дена“, стои во ставот на најголемата опозициска партија по повод одвојувањето на земјата од Албанија.