Во кујните на рестораните и хотелите ширум светот се фрла до 20% од купената храна, што ја чини угостителската индустрија повеќе од 100 милијарди долари годишно – врз основа на овие податоци, тимот на Winnow дизајнираше технологија која им помага на професионалните кујни да ја намалат количината на фрлената храна.
Досега, велат, се заштедени 50 милиони оброци со што се спречува емисијата на 87.000 CO2, а вкупната финансиска заштеда благодарение на технологијата е 70 милиони американски долари.
Hilton, Marriott, Mandarin Oriental се само дел од светски познатите синџири на хотели кои го намалија фрлањето храна благодарение на технологијата базирана на вештачка интелигенција. А од компанијата тврдат дека имаат решение за сите кујни – од мали градски хотели, преку бродови за крстарење, до големи одморалишта.
Како функционира системот?
Како функционира технологијата, која, според компанијата, ја користат над 2.700 готвачи во 85 земји? Како што е објаснето, отпадот во кујните најчесто се создава затоа што готвачите ги немаат потребните алатки за точно мерење и управување со отпадот.
Системот прави фотографии од храната што се фрла, и е обучен да препознава 1.000 видови храна. Поаѓајќи од правилото „она што може да се мери, може да се контролира“ и собирање податоци во реално време, системот им овозможува на вработените да видат каде се создава најголемиот отпад, а потоа, врз основа на тие податоци, различно да ги планираат менијата, да воведат различни порции, QR кодови на менијата кои на гостите ќе им дадат идеи за рецепти и совети како да го намалат отпадот од храна дома.
Од Лондон до Дубаи: Што најмногу се фрла?
Благодарение на оваа технологија, Marriott го намали отпадот за 25% во 53 хотели во Велика Британија, Ирска и нордиските земји во текот на половина година. Тоа, велат тие, е еквивалентно на 486 тони CO2 што би се ослободиле во атмосферата, или доволно за полнење на над 32 милиони мобилни телефони.
Mandarin Oriental Hotel Group го намали отпадот за 36% во четири од своите хотели во Лондон, Дубаи, Хонг Конг и Мајами, заштедувајќи им 207.000 американски долари. Сега планираат технологијата да ја воведат во сите 40 објекти до крајот на годинава.
Hilton објави дека во пилот-проектот „Зелен појадок“ спроведен минатата година, го намалил фрлањето храна за 62% во 13 хотели во Обединетите Арапски Емирати. Тоа се повеќе од 400.000 оброци. Технологијата покажа дека лебот, пецивата, јајцата, овесната каша, печениот грав и шакшуката се меѓу намирниците кои најмногу се фрлаат.
Да потсетиме, Програмата на ОН за заштита на животната средина проценува дека една третина од произведената храна се фрла, што е 1,3 милијарди тони што ја чини глобалната економија 940 милијарди американски долари. Покрај економското влијание, има и еколошки, бидејќи со гниење на депониите, фрлената храна испушта метан, кој е 25 пати посилен од јаглерод диоксидот.