Медиумите во Англија во последните денови на големо пишуваат дека менаџерот на Манчестер Сити, Пеп Гвардиола ги бара главните кандидати за преземање на националниот тим на земјата, откако привремениот селектор Ли Карлси нема да остане на оваа функција.
„Телеграф“ тврди дека Гвардиола добил понуди од три репрезентации оваа година, вклучувајќи ја и Англија, при што Шпанецот има вистински интерес да се обиде во таква нова улога, а парите не се одлучувачки фактор. Сепак, тоа не може да се случи пред 2026 година, бидејќи Гвардиола размислува да потпише нов договор со Манчестер Сити.
Изданието додава дека Шпанецот не ја отфрлил можноста за финални разговори со ФА на земјата и дека репрезентацијата на Англија е опција за него доколку реши да го напушти клупскиот фудбал. Му се допаѓа и земјата и играчите, сакајќи на крајот да го однесе тимот на Светското првенство.
Но, Гвардиола се уште не донел одлука за својата иднина. Се вели дека Пеп би можел тоа да го направи следната недела, следниот месец или следната година, во зависност од преговорите со Сити за продолжување на договорот. Сепак, тоа ќе зависи и од евентуалната казна што им се заканува на „граѓаните“ поради 115-те пријави против клубот.
Актуелниот договор на Гвардиола со шампионот истекува на крајот на сезоната, а друга опција е да паузира една година, како што направи по заминувањето од Барселона во 2012 година. Сепак, најверојатното сценарио во моментов се смета дека е тој да потпише нов договор со Сити, иако на само уште една година. Од „Етихад“ би сакале рокот на договорот да биде подолг, но би поздравиле и продолжување на една година.
Ако тоа се случи, Шпанецот ќе биде на чело на Манчестер Сити една деценија и на самиот тој му се допаѓа идејата овој период да заврши во 2026 година.