Тренерот на Реал Мадрид, Карло Анчелоти е загрижен откако неговиот тим загуби со 3-1 од Милан во Лигата на шампионите, претрпувајќи втор убедлив пораз во низа пред своите навивачи.
„Мора да бидеме загрижени, бидејќи тимот не игра добро“, изјави 65-годишниот Анчелоти во подножјето на стадионот „Сантијаго Бернабеу“ во вторникот вечерта.
Европскиот шампион претходно таму загуби со 0-4 од најголемиот ривал Барселона во шпанското првенство.
„Мора да бидеме покомпактни и поорганизирани. Примивме многу голови… Тимот не е организиран на теренот и мора да работиме на тоа“, изјави Анчелоти.
„Мора да бидеме фокусирани на она што го имаме денес, а тоа е тим кој не ја покажува својата најдобра верзија“, потенцира Италијанецот.
На прашањето дали проблемот е меѓусебното недоразбирање меѓу напаѓачот Винисиус Жуниор и другата голгетерска ѕвезда Килијан Мбапе донесена летово од ПСЖ, Анчелоти одговори дека „тоа не е случај“.
„Проблемот не е во нивното недоразбирање, туку во тоа што противниците лесно стигнуваат пред нашиот гол. Тоа е проблемот“, рече тој.
Тоа беше и втор пораз за Реал Мадрид по четири одиграни натпревари од Лигата на шампионите. Во Франција беше поразен од Лил со 1:0. Реал, пак, ги победи Штутгарт и Борусија Дортмунд со 3:1 и 5:2.
Анчелоти рече дека неговите играчи „не се немотивирани“.
„Но, добро е што сега се депресивни, исто како и јас. Мораме да најдеме решение, бидејќи ќе биде тешко да се протурка вака до крајот на сезоната“, истакна тој.
Реал Мадрид имаше слободен викенд бидејќи нивниот првенствен натпревар во Валенсија беше одложен поради смртоносните поплави во областа.
Во сабота го очекува нов домашен натпревар против Осасуна. Во Лигата на шампионите, сепак, го очекува тешко гостување против Ливерпул.