Тренерот на Барселона, Ханси Флик е задоволен од победата над Брест од 3:0 во Лигата на шампионите. Тој ги пофали своите играчи за нивниот настап и истакна дека ова е важна победа, особено ако се има предвид дека цели кон топ 8 и директен пласман во осминафиналето. Беше истакнато и постигнувањето на Роберт Левандовски.
„Многу сум среќен со трите бода. Доминиравме против противникот и беше добар натпревар. Сезоната е долга и ќе има натпревари кои нема да завршат како што очекуваме. Но, ова беше важна победа. Педри одигра добар натпревар. Важно беше да се контролира средниот ред. Сите играчи од средниот ред завршија одлична работа со и без топка“, изјави Флик.
Тој го коментираше и 100-от гол на Роберт Левандовски во натпреварувањето.
„Не сум добар со статистиката. Но, после Меси и Роналдо, Роберт е најдобар стрелец. Да се биде трет најдобар стрелец е нешто неверојатно. Работев со него две години во Минхен, каде што исто така собори некои рекорди. Целиот тим го поддржува и му помага да постигнува голови“, додаде Германецот.
На крајот проговори и за неговите цели во Лигата на шампионите.
„Сакаме да завршиме во топ 8, тоа е нашата цел. Ни остануваат уште неколку натпревари. Играме против Борусија и тие се снаоѓаат прилично добро. Но, ние ќе бидеме подготвени. Знаеме што треба да направиме да бидеме конкурентни во Дортмунд. Целта е да се најдеме во топ 8, бидејќи така ќе имаме две недели одмор. Би сакал да постигнеме повеќе голови, но трите бода се најважни“, додаде стручњакот.