Едуардо Бове, фудбалерот на Фиорентина кој се онесвести на натпреварот против Интер се разбуди и е во свесна состојба, информира познатиот новинар и инсајдер Фабрицио Романо.
Страшни сцени беа видени во 15. минута од натпреварот помеѓу Фиорентина и Интер кога Бове се онесвести на теренот. Веднаш италијанскиот фудбалер беше изнесен од теренот на носилки и пренесен во болница, а сега доаѓаат добри вести.
„Позитивни вести за Едуардо Бове, ноќта поминала добро и играчот на Фиорентина бил екстубиран по речиси 13 часа. Едуардо е буден, свесен и одговара на прашања“, соопшти Романо.
По страшните сцени, мечот беше прекинат и се чекаше соопштението на Фиорентина, која објави дека Бове е на интензивна нега.
„Фиорентина и Универзитетската болница Кареги соопштуваат дека Едоардо Бове, кој изгуби свест на теренот за време на натпреварот Фиорентина – Интер, моментално е на интензивна нега. Фудбалерот на Фиорентина беше итно примен, а првите кардиолошки и невролошки тестови ја отфрлија можноста за акутно оштетување на централниот нервен систем и кардио-респираторниот систем. Бове повторно ќе биде тестиран во следните 24 часа“, се вели во соопштението.
Бове има 22 години и тоа што му се случи длабоко ја вознемири и ја потресе јавноста во Италија, но и ширум светот. За среќа лекарскиот тим реагираше брзо и Италијанецот е свесен.