Од страв како ќе изгледа животот по ерата на Јирген Клоп до голема еуфорија – еве низ што поминаа навивачите на Ливерпул од 26 јануари до последните денови од ноември кога стана извесно дека нивните миленици станаа фаворити број еден во борбата за титулата на англискиот шампион.
Арне Слот пристигна на „Енфилд“ преку задната врата ова лето, не затоа што нема репутација на тренер – ја изгради додека работеше во АЗ Алкмар и Феенорд – туку затоа што не беше лесно да се замисли дека „црвените“ ќе најде победничкa формула толку брзо по заминувањето на Клоп. Изгледа дека ja имаат и функционира совршено.
Навистина, има долг пат до трофеј оваа сезона, вистинските предизвици допрва доаѓаат (декември и јануари се посебнo пеколни месеци во англискиот фудбал), но Слот ја заслужи довербата бидејќи се што направи досега со великанот од градот на Битлси е фасцинантно.
Затоа Ливерпул е лидер на табелата во Премиер лигата со 34 од можни 39 бодови (девет повеќе од Арсенал и Челси, 11 од Манчестер Сити), но и во Лигата на шампионите каде ги освоија сите пет меча.
Колку е стабилен Ливерпул на Слот се виде минатата недела, која почна со победа над Реал Мадрид, а заврши во неделата на дербито со Сити, во кое не остави ни трошка дилема – победата од 2:0 е дури и почиста од колку што сугерира резултатот, па лидерот на табелата одби на каков било начин да „учествува“ во будењето на актуелниот шампион кој ги доживува најтешките моменти во ерата на Пеп Гвардиола.
Така паднаа Сити и Реал во „Слот машина“, бидејќи оваа сезона Ливерпул го победи и најголемиот ривал, Манчестер Јунајтед, актуелниот шампион на Германија Баер, Милан… И тоа без примен гол – само „росонерите“ ја затресоа нивната мрежа, но беше забележана рутинска победа на „Сан Сиро“ од 3:1.
– Излегувањето како победник од дуелот со Реал и Сити дава големо задоволство – тоа се големи тимови со одлични тренери и мораме да бидеме горди – изјави Слот.
Ливерпул дефинитивно заслужи да се зборува и да се пишува повеќе, но донекаде остана во сенка на Сити – тема број еден е кризата на „граѓаните“ и проблемите кои Гвардиола не очекуваше да му се случат во кариерата.
– Никој не мора да ги жали Пеп и Сити, тоа би било погрешно. Ќе се вратат, едвај ноември е – ја предупреди Слот островската јавност да очекува реакција од тимот кој ги подигна стандардите во Премиер лигата на незамисливи височини.
– Мислам дека минатата сезона во февруари Сити беше далеку од Арсенал, па на крајот ја освои титулата. Ако некој може да излезе од ваква криза, тоа се Гвардиола и Сити – забележува Слот.
Ливерпул утре гостува во Њукасл, а в сабота игра против Евертон – иако традиционално им „лежат“ двата ривали, јасно е дека одењето на „Сент Џејмс Парк“ и на „Гудисон Парк“ секогаш може да прави проблеми.
– Не направивме ништо, иако сме презадоволни од состојбата на табелата – изјави Слот.
Единствено Нотингем Форест ги совлада „црвените“ оваа сезона, а единствениот тим што им „скина“ два бода беше Арсенал – 2:2 беше во Лондон во дербито во кое „топчиите“ двапати имаа предност и беа реално поблиску до победата.
– Не постои лига во светот со толку многу големи тимови. Сакам да продолжиме вака, да веруваме дека можеме да победиме на секој натпревар, иако знаеме дека нема секогаш да се радуваме. Важно е дека сме подготвени да ја пречекаме „бурата“, таа сигурно ќе дојде – заклучи Слот.