Жоао Переира, тренерот кој го наследи Рубен Аморим во Спортинг, е на работ на отказ поради лошите резултати и губењето на првото место.
Излегува дека чевлите на Рубен Аморим сепак се преголеми за Жоао Переира. Човекот кој го наследи тренерот кој на „лавовите“ им донесе две титули во последните три години се соочува со отказ само неколку недели по преземањето на функцијата.
Во моментот кога Аморим си замина од клупата на Спортинг, „зелено-белите“ од Лисабон беа први на табелата со пет бодови пред Бенфика и шест пред Порто. Сега „лавовите“ се втори со бод помалку од Бенфика и се изедначија со Порто.
Во Лигата на шампионите, Спортинг доживеа два порази, во Лисабон од Арсенал и на гостувањето кај Бриж. Под водство на Аморим, Спортинг имаше три победи и едно реми во првите четири кола, вклучувајќи ја и победата над Манчестер Сити.
Се на се, откако Жоао Переира седна на клупата на Спортинг, „лавовите“ одиграа осум натпревари, забележаа три победи, од кои две беа во купот, а една беше извојувана по продолженијата, а само една победа забележаа во првенството.