„Meta“ планира да намали околу пет отсто од својата работна сила, фокусирајќи се на вработените со најниски резултати.
Извршниот директор на компанијата, Марк Закерберг, ги информирал вработените за одлуката преку меморандум објавен на внатрешниот форум Workplace. Закерберг им порачал на вработените дека 2025 година ќе биде „интензивна година“.
Компанијата во посебна порака, објавена од еден од нејзините директори, соопшти дека ја напушта соработката со „приближно 5% од најслабите вработени“.
„Meta“ во моментов има повеќе од 72.000 вработени, според последниот квартален извештај.
Најави дека вработените погодени од отпуштањата ќе бидат известени до 10 февруари и ќе добијат отпремнини согласно претходните пакети. Ова намалување на работната сила е најголемо по масовните отпуштања во 2022 и 2023 година, кога компанијата отпушти 21.000 вработени, речиси четвртина од вкупната работна сила.
Првите информации за кратењата ги објави „Блумберг“, повикувајќи се на интерен меморандум.
Оваа одлука доаѓа по големите оперативни промени во „Meta“ со цел зајакнување на односите со новоизбраниот американски претседател Доналд Трамп.
Минатата недела, Закерберг го објави крајот на програмата за проверка на факти од трета страна и преминување кон моделот „Забелешки на заедницата“ сличен на оној на X платформата на Илон Маск, каде што корисниците додаваат контекст на објавите.
„Неодамнешните избори исто така се чувствуваат како културна пресвртница за повторно давање приоритет на слободата на говорот, така што се враќаме на нашите корени и се фокусираме на намалување на грешките, поедноставување на нашите правила и враќање на слободата на изразување на нашите платформи“, кажа Закерберг во видео пост.
CNBC го објави интерниот меморандум на Закерберг.
„Meta“ развива некои од најважните технологии во светот. Вештачка интелигенција, паметни очила како следна компјутерска платформа и иднината на социјалните мрежи. Ова ќе биде интензивна година и сакам да се уверам дека ги имаме најдобрите луѓе во нашите тимови. Одлучив да ја подигнам границата на управувањето со перформансите и побрзо да ги отстранам вработените со ниски резултати. Вообичаено, отпуштаме луѓе кои не ги исполнуваат очекувањата во рок од една година, но сега ќе спроведеме поопсежни намалувања засновани на перформанси во овој циклус, со план за пополнување на овие позиции во 2025 година.
Нема да ги отпуштиме сите што не ги исполниле очекувањата ако сме оптимисти за нивните идни перформанси, а на оние што ги отпуштаме ќе им бидат обезбедени дарежливи пакети за отпремнини во согласност со претходните кратења.
Дополнителни насоки за менаџерите ќе бидат обезбедени пред процесот на оценување. Вработените погодени од отпуштањата ќе бидат известени до 10-ти февруари или подоцна, во зависност од нивната локација надвор од САД“, се вели во меморандумот на Закерберг.