Среќко Катанец (61), легендарниот поранешен словенечки и југословенски фудбалер, а сега селектор на Узбекистан, има рак. Нему му е дијагностицирано малигно заболување и не може да ја води репрезентацијата на азиската земја до понатамошно известување. „Репрезентацијата на Узбекистан денеска го започнува тренинг кампот во Доха. Селекторот Катанец нема да може да присуствува на кампот поради влошената здравствена состојба“, соопшти Фудбалската федерација на Узбекистан.
Катанец е роден во Љубљана, но неговите родители се Хрвати од Меѓумурје. Се проби во Олимпија каде стана југословенски репрезентативец. Оттаму дојде во Динамо во 1985 година, но помина само една сезона на Максимир, пред да се пресели во Партизан. За две сезони во Белград, еднаш ја освои титулата во Југославија. Потоа следеше преселба во странство, каде Катанец, еден од најдобрите дефанзивци во југословенскиот фудбал, настапуваше за гигантите во најсилните лиги.
Во неговата единствена сезона во Штутгарт, тој го загуби финалето на Купот на УЕФА од Наполи на Марадона. Потоа се пресели во Сампдорија со која за пет години го освои италијанскиот шампионат и куп, како и Купот на победниците на куповите, а играше и во финалето на Купот на шампионите. Катанец играше на едно евро и едно Светско првенство како репрезентативец на Југославија и ја освои олимписката бронза во 1984 година.
Како тренер постигна историски успеси за словенечкиот фудбал. Тој беше првиот што ја одведе репрезентацијата на големо натпреварување, Еуро 2000, а потоа и на првото Светско првенство две години подоцна. Тој ги водеше Македонија (2006-09), ОАЕ (2009-211) и Ирак (2018-21), а повторно беше селектор на репрезентацијата на Словенија во 2013-17 година.
Од 2021 година е селектор на Узбекистан.