Јавен обвинител од Основното јавно обвинителство за гонење на организиран криминал и корупција, по спроведена истражна постапка, до Основнииот кривичен суд – Скопје поднесе Обвинителен акт против две лица кои изминатите четири години неовластено приредувале игри на среќа, а паричните средства што притоа ги стекнале ги пуштале во оптек и купувале движен и недвижен имот. Со преземените дејствија обвинетите сториле кривично дело Приредување на игри на среќа без лиценца односно дозвола од надлежен орган од чл.156 ст.3 од Законот за игрите на среќа и забавните игри, како и кривично дело Перење пари и други приноси од казниво дело од чл.273 ст.1 од Кривичниот законик.
Во исто време, со истражната постапка против овие двајца обвинети, која започна во ноември минатата година, се водеше и скратена постапка за уште две лица за кривично дело Перење пари и други приноси од казниво дело. Притоа, врз основа на спогодба, едно лице е осудено и му е изречена алтернативна мерка – условна осуда со утврдена казна затвор во траење од една година, која нема да се изврши доколку обвинетиот во рок од две години не стори ново кривично дело, а за другото лице е поднесен обвинителен предлог.
Обвинителството побара од судот обвинетите да ги огласи за виновни за делата што им се ставаат на товар и предложи да им биде одземен движниот и недвижниот имот стекнат со кривичните дела и тоа: три стана со помошни простории со површина од 32 м2, 95 м2 и 48 м2, две гаражи со површина од по 20 м2 и една од 16 м2, четири ПМВ и тоа марка „Ауди А7 Хибрид“, „Порше Е – Хибрид“, „Мерцедес Бенз“ модел „Е350 Блуетец“ и „Мини Оне Д“, два моторцикли марка „Пиагио“ и еден марка „Кавасаки Нинџа“, еден четирицикл марка „Сузуки“, мобилни телефони, лап топ компјутери и други електронски уреди, парични средства во износ од 500 евра и безмалку половина килограм златен накит.