Пеп Гвардиола и неговиот стручен штаб на Сити имаа тежок ден откако загубија со 3-2 од Реал Мадрид на „Етихад“ во првиот натпревар од плеј-офот во Лигата на шампионите (за пласман во осминафиналето). Сепак, граѓаните секако немаат време за жалење.
Сити, кој моментално се наоѓа на петтото место во Премиер лигата, го очекува тежок распоред без одмор. Овој викенд, во сабота на 15 февруари, „граѓаните“ го пречекуваат Њукасл, кој е шести на табелата со ист број бодови како и тимот на Гвардиола. Само четири дена подоцна, во среда на 19 февруари, Сити се соочува со реваншот против Реал Мадрид во Лигата на шампионите, каде што мора да ја надополни негативата од првиот натпревар.
Сепак, четири дена по второто коло од плеј-офот против Реал Мадрид, Сити ќе биде домаќин на лидерот во Премиер лигата и победник во групната фаза од Лигата на шампионите, Ливерпул. И како крај за овој исклучително тежок февруари, Сити ќе се соочи со Тотенхем на 26-ти, очајнички обидувајќи се да излезе од лошата форма.
По поразот од 2-3 од тимот на Карло Анчелоти, Пеп Гвардиола се обиде да ги бодри своите играчи и навивачи.
„Направивме многу добри работи против Реал Мадрид, иако резултатот е таков каков што е. Тешко е, но ќе го надминеме. Сега се соочуваме со Њукасл, а потоа треба да одиме на „Бернабеу“. Знаеме што треба да направиме – да постигнеме гол”.
Џон Стоунс веднаш по мечот со Реал Мадрид ја сумираше атмосферата во соблекувалната на Сити.
„Има чувство на лутина и разочарување“, рече дефанзивецот во изјава за Амазон. „Мораме да се исправиме во тешките моменти, како што рече тренерот, мора да се соочиме со себе и да преземеме одговорност“.
Гвардиола ја повтори фразата што веќе ја кажа во декември, во екот на кризата на неговиот тим, поточно по поразот од 1-2 во дербито против Јунајтед: „Веќе го кажав тоа пред неколку месеци, не сум доволно добар“.
А што се однесува до тимот, „не сме стабилни во моментов и за жал, ова не е прв пат, тоа веќе се случи со Феенорд, Спортинг, Брентфорд, Манчестер Јунајтед и на многу натпревари, на кои се опуштивме“.