Европа се соочува со ризик да стане „музеј“ доколку не ги олесни строгите ограничувања на технологиите за вештачка интелигенција (AI) и не го дерегулира пазарот, изјави во четвртокот шведскиот премиер Улф Кристерсон.
„Мислам дека навистина треба да направиме голем скок во Европа… Американската и кинеската економија пораснаа многу побрзо од европските во последните 20 години“, рече Кристерсон на настанот „Techarena“ во Стокхолм. „Ако не го промениме ова, Европа всушност ќе стане еден вид музеј во споредба со другите делови на светот“, додаде тој, според CNBC.
Кристерсон им се придружи на голем број европски лидери кои ја истакнаа потребата Европа да учествува поконкурентно во глобалната трка за развој на технологија за вештачка интелигенција на Самитот за вештачка интелигенција во Париз минатата недела.
Францускиот претседател Емануел Макрон најави инвестиција од 109 милијарди евра во вештачка интелигенција, која вклучува странски инвеститори како Обединетите Арапски Емирати и американски и канадски инвестициски фондови, како и домашни компании како Iliad, Orange и Thales.
Макрон ја спореди оваа инвестиција со неодамнешниот приватен инвестициски проект за вештачка интелигенција Stargate, вреден 500 милијарди долари, објавен минатиот месец од американскиот претседател Доналд Трамп. Претседателката на Европската комисија Урсула фон дер Лајен исто така изјави дека ЕУ ќе мобилизира вкупно 200 милијарди евра за инвестиции во вештачка интелигенција низ Европа.
Критики на европските регулативи
Против строгите европски регулативи се изјасни и американскиот потпретседател Џеј Ди Венс, откако на самитот во Париз истакна дека Европа посветува премногу внимание на регулирање на вештачката интелигенција наместо да ја развива. „За да изградиме доверба, потребни ни се меѓународни регулаторни режими кои го поттикнуваат развојот на технологијата за вештачка интелигенција, а не ја задушуваат. Сакаме нашите европски пријатели да гледаат со оптимизам на овој нов технолошки хоризонт“, рече Венс.
Технолошките експерти претходно ја критикуваа ЕУ дека премногу се фокусира на регулативата. Законот за вештачка интелигенција, кој стапи на сила, го претставува првиот сеопфатен сет на правила за управување со ризиците поврзани со вештачката интелигенција.
Во својот говор, Кристерсон истакна дека Европа мора да стане место каде што бизнисот и иновациите можат да напредуваат. „Тоа значи помала регулатива, поголем пристап до капитал и таленти“, рече тој.
„Во моментов имаме компании кои се соочуваат со потешкотии во користењето на најновите технологии поради нејаснотии во европското законодавство. Компаниите основани во Европа се преселуваат во САД поради недостаток на пристап до капитал. Тоа едноставно не е доволно добро“, предупреди Кристерсон.