Поранешниот играч од средниот ред на Манчестер Сити, Дитмар Хаман, верува дека англискиот клуб и менаџерот Пеп Гвардиола се движат кон разделба.
Сити, кој долго време беше исклучително доминантен под водство на шпанскиот стручњак, минува низ тешка сезона во Премиер лигата, во која реално завршија шансите за одбрана на титулата, а пред неколку дена тимот беше елиминиран од Лигата на шампионите, губејќи од Реал Мадрид во плеј-офот.
Повредата на крајот на сезоната на маестрото на тимот од средниот ред, Родри имаше огромно влијание, но другите водечки играчи се мачат на теренот.
„Мора да направите голема промена и јас имам големи сомнежи дали таков чекор би бил можен со Гвардиола“, коментираше поранешниот германски репрезентативец Хаман во својата колумна за телевизијата „Скај Германија“.
„Ако сакате да го обновите тимот, потребно е трпение, но и енергија и оган. Во моментов тоа не го гледам кај Пеп Гвардиола“, додаде 51-годишниот Германец.
Гвардиола дури на крајот на минатата година го обнови договорот на уште две сезони, а според пишувањата на медиумите, одлуката го чинела бракот. За време на напорниот јануарски преоден рок, Манчестер Сити донесе неколку играчи, меѓу кои и египетскиот напаѓач Омар Мармуш, но Хаман не е убеден во преземените мерки.
„Веројатно најдоброто нешто за двете страни би било разделба“, смета тој.
Единствената надеж на Сити за трофеј оваа сезона останува ФА Купот, иако „граѓаните“ ќе учествуваат и на проширеното Светско клупско првенство во јуни.