Израелското Министерство за надворешни работи соопшти дека Израел ја отфрла претстојната конференција за војната во Појасот Газа што ќе се одржи во Женева во врска со почитувањето на меѓународното хуманитарно право на Блискиот Исток.
„Планираната конференција е дел од правната војна против Израел“, се вели во соопштението, во кое се нагласува дека Тел Авив нема да соработува, објави „Тајмс оф Израел“.
Претстојната конференција на државите кои ја ратификуваа Четвртата Женевска конвенција од 1949 година, со која се регулира заштитата на цивилите за време на војна и окупација, треба да се одржи во петок во Женева, а израелското министерство соопшти дека земјите потписнички во минатото се состанувале само три пати, а сите три пати во врска со Израел.