Сопственичката на Лос Анџелес Лејкерс, Џени Бас, откри нови детали за она што многумина го сметаат за еден од најголемите трејдови во историјата на НБА, во кој Лука Дончиќ пристигна во „Градот на ангелите“ во замена за Ентони Дејвис. Првата дама на Лејкерси изјави дека Дејвис се преселил во Маверикс бидејќи не бил задоволен од својата улога во тимот. „АД се пожали на позицијата на која играше“, рече Бас.
Иако Ентони Дејвис не побарал трејд од Лејкерс пред да биде вклучен во зделката со Далас Маверикс за Лука Дончиќ, се чини дека тој не бил целосно задоволен во ЛА Лејкерс.
Дејвис играше за Лејкерс од 2019 до 2025 година и му помогна на тимот да ја освои шампионската титула во НБА во 2020 година. Пред трејдот на почетокот на февруари, Дејвис имаше просек од 25,7 поени, 11,9 скока и 2,1 блокади по натпревар.
„Маверикс немаат шанси да освојат прстен со овој тим“
Сепак, неговиот почеток со Маверикс не можеше да биде полош. На своето деби на 8-ми февруари, тој се здоби со повреда на левиот адуктор и е надвор од терените речиси еден месец. Постои можност Дејвис да биде надвор од теренот до крајот на сезоната како мерка на претпазливост, со оглед на неговата долга историја на повреди.
Според Тим Бонтемпс од ESPN, Далас треба да го трејдува Дејвис во текот на летото за да ја максимизира неговата вредност, бидејќи „Маверикс немаат шанси да освојат прстен со овој тим“.