СДСМ го осуди најновиот еколошки инцидент во Крива Река, каде што се излеале отрови, тешки метали и цијанид, кои создаваат сериозна опасност за животната средина и здравјето на граѓаните. Потпретседателката на СДСМ, Каја Шукова, нагласи дека ова не е само еколошка катастрофа, туку и директен резултат на институционалните пропусти кои доведоа до сериозна закана по здравјето и животот на луѓето.
„Загрозени се земјоделски површини, бунари и води во Крива Река, Пчиња и Вардар. Прашањето е колку нашите граѓани се изложени на контаминирана храна која може да биде опасна за здравјето?“ – праша Шукова.
Пазарите во Скопје, Куманово, Велес и Паланка се снабдуваат со производи кои се наводнуваат токму со водите од овие реки, што ја прави ситуацијата уште потешка.
„Ова е огромен скандал за кој мора да има одговорност. Екоцидот е кривично дело согласно македонските закони. Не може да останеме равнодушни кога цела заедница е загрозена“, додаде таа.
Шукова ги критикуваше и државните институции, особено Инспекторатот за животна средина, кој според неа не ги презел неопходните мерки, туку ја минимизирал хаваријата, тврдевши дека се излеала „само вода“. СДСМ бара темелна и независна истрага, како и јавноста да биде информирана за сите инспекциски извештаи во врска со рудникот Тораница.
„Односот на институциите е катастрофален и мора да се преземат одговорност за затајувањето на ваквиот еколошки инцидент. Ние ќе бараме оставка од пратеникот на ВМРО-ДПМНЕ, Емил Спасовски, кој свесно ширел дезинформации“, изјави Шукова.
СДСМ бара одговорност од сите инволвирани страни, вклучувајќи и одземање на еколошката дозвола за рудникот Булмак 2016, кој според партијата има сериозни и повторени прекршувања.
„Ова не е локален проблем. Ова е прашање за јавната безбедност и здравје на сите граѓани во Македонија. Ако правдата не победи, ќе бидеме соучесници во овој еколошки криминал“, заклучи Шукова.
СДСМ ќе продолжи да бара правдата за загрозеното здравје на граѓаните и ќе се бори за правично и транспарентно решавање на овој еколошки скандал.