Мене ми беше срам да ве слушам затоа никогаш во својот живот, вака бесрамно не сум чул некој функционер да се дрзне со факти кои се лага и членови кои се однесуваат на друга фактичка состојба. Сакате врз основа на гневот и бесот на македонските граѓани, политички профитирате. Нека ви служи на чест, рече министерот за внатрешни работи, Панче Тошковски, одговарајќи на пратеничко прашање на Миле Талески од СДСМ, на денешната седница во Собранието.
Министерот истакна дека биле поднесени нула кривични за Тетовската модуларна болница, нула за трагедијата во Бугарија со „Беса Транс“, а за кочанската трагедија досега биле процесуирани две кривични пријави („тешки дела против општата сигурност“ по член 292 во врска со „предизвикување општа опасност“ по член 288 од Кривичниот законик и „примање поткуп“ по член 357 од Кривичниот законик) за 34 физички лица и 3 правни лица.
-Господине министре немате потреба од нервоза. Знаеме дека сте во катастрофална состојба, му рече Талески, прашувајќи го Тошковски околу одговорноста за трагедијата во Кочани.
Тошковски истакна дека пратеникот манипулира затоа што го обвинуваат за селективен пристап, а со денешното трето поставено прашање не знае за што го обвинува.
-Кој ќе ве разбере вас, бе брате? Не можат да ве разберат македонските граѓани затоа што и вие не се разбирате што прашувате? Умре тоа време кога се спасуваа луѓе со кревање на телефон. Дојде време кога секој што се огрешил, одговара – без разлика дали е министер, градоначалник, обезбедување на било кого, истакна меѓу другото првиот полицаец во државата.