Поранешниот претседател на Америка, Барак Обама искрено проговори за состојбата на неговиот брак со Мишел Обама.
„Многу бев зависен од мојата сопруга. Се обидувам да се извлечам од тоа правејќи забавни работи одвреме-навреме“, му рекол Обама на претседателот на колеџот Хамилтон, Стивен Тепер, за време на разговорот во четвртокот, објави „Page Six“
Поранешниот претседател на Соединетите Американски Држави претходно навести дека неговите последователни претседателски мандати, од 2009 до 2017 година, оставиле белег на неговиот однос со сопругата. „Јас само ќе го кажам ова: навистина ми помага што повеќе не сум во Белата куќа и што имам малку повеќе време“, изјави Обама уште во 2023 година.
Мишел во декември 2022 година призна дека не можела да го поднесе десет години својот сопруг, додека нивните ќерки Малија и Саша биле мали. „Бракот никогаш не е 50-50, никогаш. Понекогаш јас имам 70, тој има 30. Понекогаш тој има 60, јас 40. Но знаете што? Десет лоши години, а ние сме 30 заедно“ изјави таа.
Следната година таа истакна дека решила отворено да зборува за бракот бидејќи е тежок, а многу млади се откажуваат од него поради работи кои едноставно се дел од обврската, додавајќи дека компромисите во бракот не се секогаш забавни.
Двојката, која се венча во октомври 1992 година, неодамна се соочи со гласини за развод кои се појавија на почетокот на јануари откако Обама сам присуствуваше на серија политички настани, вклучувајќи го и погребот на поранешниот претседател Џими Картер и инаугурацијата на Доналд Трамп.
Минатата година во август, за време на политичката борба меѓу Трамп и американската потпреседателка Камала Харис за Белата куќа, двојката Обама остро го критикуваше Трамп. Мишел Обама го обвини за ширење „грди, мизогинистички и расистички лаги“. Тоа беше последното заедничко јавно појавување на двојката Обама, па некои го гледаат нејзиното очигледно повлекување од политичкиот живот како обид да се избегне средба со Трамп.
Минатиот месец и самата поранешна прва дама ги коментираше гласините што се шират на социјалните мрежи.
„Не можете да живеете преку социјалните мрежи. Не дозволувајте таа негативна енергија да влезе во вашиот простор. Тоа се луѓе кои не ве познаваат. Многу од тие работи се измислени и не ги хранете на кој било начин“, рече таа.
Извор близок до политичката двојка тврди дека Мишел едноставно е емоционално исклучена од политичкиот живот во Вашингтон и не се преправа, ниту се обидува да глуми дека таа и нејзиниот сопруг се совршен пар.