Претседателот на Федералните резерви на САД, Џером Пауел, изнесе нова прогноза за можните економски последици од воведувањето на царини и нагласи дека тие би можеле да бидат загрижувачки. Говорејќи на настан организиран од Економскиот клуб од Чикаго, Пауел истакна дека САД се соочуваат со сериозни предизвици.
„Нивото на зголемување на тарифите што досега е објавено е значително повисоко од очекуваното. Можеме да се најдеме во тешко сценарио во кое нашите цели ќе бидат сериозно загрозени“, рече Пауел.
Тој нагласи дека најдобриот потег што ФЕД може да го направи во моментов е да „застане“ и да почека додека податоците не покажат како економијата ќе реагира на политиките на администрацијата на Трамп.
„Ако дојде до тоа, ќе размислиме колку економијата ќе биде оддалечена од нашите цели, како и за потенцијалните временски рамки во кои тие празнини би можеле да се затворат“, додаде Пауел.
Се осврна и на прашањето за инфлацијата, оценувајќи дека тарифите многу веројатно ќе предизвикаат барем привремено зголемување на инфлацијата.
„Инфлаторните ефекти, исто така, би можеле да бидат потрајни“, предупреди тој.
Со оглед на сигналот дека нема да има брзање за намалување на каматните стапки, берзанските индекси дополнително паднаа во средата. Dow Jones изгуби 1,4%, S&P 500 се намали за 2,25%, додека Nasdaq забележа пад од 3,35%.