Напаѓачот на Реал Мадрид, Килијан Мбапе, ќе го пропушти натпреварот против Хетафе поради повреда на десниот зглоб и останува неизвесен за саботното финале од Купот на Кралот против Барселона.
„Тој се мачи со повреда и не може да му помогне на тимот. Се повреди на натпреварот против Арсенал минатата среда и оттогаш е на терапија. Се прави сè за да биде подготвен за сабота“, изјави тренерот на Реал, Карло Анчелоти, на прес-конференција.
Во меѓувреме, Реал беше елиминиран во четвртфиналето од Лигата на шампионите, по поразот од англискиот тим Арсенал. Во Ла Лига, Мадрид заостанува четири бода зад лидерот Барселона, па нивните најголеми шанси за трофеј сезонава се во Копа дел Реј, каде ќе играат против најголемиот ривал на неутрален терен во Севиља.