Кристијано Роналдо продолжува неуморно да постигнува голови, но конкретните успеси продолжуваат да го заобиколуваат на Блискиот Исток.
По поразот на Ал-Наср од јапонскиот Кавасаки со 3-2 во полуфиналето на Лигата на шампионите на АФЦ, Роналдо остана сам на средината од теренот, видливо фрустриран, гестикулирајќи со рацете и нозете, веројатно мислејќи на пропуштената шанса во судиското продолжение. Тој погледна кон небото и како да праша: „Зошто јас?“
Но, ова не беше случај на лоша среќа. Да беше Роналдо попрецизен, Ал-Наср ќе беше во финалето – ја погоди пречката со глава во првото полувреме и промаши два слободни удари во второто полувреме.
Во својот најдобар период, Кристијано Роналдо беше незапирлив кога беше најважно, но во Саудиска Арабија не успеа да го оправда својот углед на одлучувачки играч. Дури може да се каже дека неговото доаѓање го влоши тимот – кога пристигна во јануари 2023 година, Ал-Наср беа први во лигата.
Иако го подигна глобалниот профил на саудискиот фудбал, Роналдо не успеа да го воведе Ал-Наср во нова ера на успех. Откако тој дојде, клубот не освои ниту еден важен трофеј, а освен чудо во последните пет кола, ниту оваа сезона нема да заврши со прослава.
Се чини дека авантурата на Роналдо стана повеќе мисија за лична статистика отколку за колективен успех. Тој сè уште постигнува голови и руши рекорди, но ако трофеите продолжат да го избегнуваат, последното поглавје од неговата кариера нема да допринесе за неговото наследство.
Сепак, Роналдо веројатно ќе освои барем една индивидуална награда – досега постигна 23 гола на 27 натпревари и води во трката за Златната копачка пред Тони (Ал-Ахли), Хамдала (Ал-Шабаб) и Бензема (Ал-Итихад). Но, поранешниот соиграч од Реал, Бензема, јасно стави до знаење кој е неговиот приоритет: „Не ме интересира тоа. Најважно е трофејот“.
Роналдо често ги славеше индивидуалните признанија повеќе отколку тимските успеси. Неговите пет „Златни топки“ беа моментите што ги издвои како доказ дека е „најдобриот играч во историјата“.
Целта на Роналдо очигледно е да достигне 1.000 гола во кариерата. Во август, тој го постигна својот 899-ти гол, а подоцна во едно интервју рече:
– Тоа ми е најважно. Прво 900, потоа 1.000 – рече тој.
Тој, исто така, додаде провокација кон Пеле, тврдејќи дека сите негови голови можат да се докажат преку видео снимки.
Денес е на 933 гола, а светот внимателно го следи благодарение на Фабрицио Романо и неговите најави. Сепак, Роналдо ретко зборува за амбициите на Ал-Наср како тим – фокусот е секогаш на неговите лични бројки.
Секој натпревар се гледа низ призмата на: „Дали Роналдо ќе стигне до 1.000?“ Притоа, се создава претстава што често го одвлекува вниманието од остатокот од тимот и нивните напори.
Не е сигурно дека Роналдо ќе може да ја постигне целта. Веројатно ќе мора да игра уште најмалку две сезони, колку што наводно трае новиот договор што го потпиша со Ал-Наср. Иако сè уште има инстинкти на голгетер, неговата брзина и подвижност полека опаѓаат.