Граѓаните на Македонија се соочуваат со нови ценовни шокови по маркетите и продавниците, откако по истекот на мерката за замрзнати маржи, цените повторно се покачени. Храната и производите кои и со замрзнатите маржи не беа достапни за граѓаните, денес се уште поскапи. Маслото за јадење е покачено од 89 на 92 денари, млекото над 72 денари, додека цените на јајцата, месото, сирењето и соковите исто така забележуваат значителни зголемувања.
Поскапеа и средствата за хигиена, со зголемување од дури 60 проценти. „Граѓаните имаат се помалку пари во своите џебови. Ова е резултат на трајно погрешната економска политика на владата“, истакнува Лолита Ристова, членка на Извршниот одбор на СДСМ.
Со цел да се намали тежината на растечките цени, СДСМ предложи мерки како укинување на ДДВ за основните производи и покачување на минималната плата на 500 евра. Но, владата одбива да ги прифати овие предлози, со што продолжуваат да растат цените, а стандардот на граѓаните продолжува да опаѓа.
„Граѓаните не можат да ги покријат основните потреби со платите што ги примаат, а властите имаат контрадикторни политики кои само ја влошуваат ситуацијата“, додава Ристова.
Таа апелира власта да ги прифати предлозите на СДСМ за укинување на ДДВ за храна и за зголемување на платите во приватниот сектор како решение за намалување на цените и подобрување на животниот стандард на граѓаните.