Францускиот претседател Емануел Макрон изјави во вторникот дека поддржува воведување нови санкции врз Русија во наредните денови доколку таа не се согласи на прекин на огнот во Украина, наведувајќи ги финансиските услуги и нафтата и гасот како можни цели.
„Имаме намера да воведеме нови санкции врз Русија во наредните денови“ доколку таа одбие да го спроведе прекинот на огнот, рече Макрон во интервју за TF1. „Се координираме во таа смисла.“
Неговата изјава уследи по онаа на германскиот канцелар Фридрих Мерц, кој претходно во вторникот изјави дека европските сојузници „значително ќе ги заострат санкциите“ против Русија доколку рускиот претседател Владимир Путин не се согласи на прекин на огнот. Мерц, исто така, спомена сектори како што се енергетиката и финансиските пазари како можни цели.
Францускиот министер за надворешни работи Жан-Ноел Баро во понеделник изјави дека од Европската комисија е побарано да предложи нови санкции во тие области.
Лидерите на Велика Британија, Франција, Германија и Полска изјавија во саботата во Киев дека ќе бидат воведени нови санкции врз Русија доколку не се согласи на 30-дневен прекин на огнот што почнува од понеделник. Наместо тоа, Путин повика на директни преговори со Украина во Истанбул на 15 мај. Американскиот претседател Доналд Трамп го поддржа во ова.
Дипломатите изјавија дека по 16 рунди европски санкции против Русија поради војната во Украина, сè потешко е да се постигне консензус меѓу 27-те земји-членки на ЕУ за нови мерки.