Семејството на Фросина Кулакова денес протестираше од Универзална сала до Основниот кривичен суд во Скопје, изразувајќи револт поради 12-годишната затворска казна за возачот кој ја усмрти нивната ќерка во јануари годинава. Бараат максимална казна од 20 години и дисциплинска постапка против судијката Снежана Марковска, која ја донесе пресудата.
„Возачот бил пијан, без дозвола, удри на пешачки премин со црвено светло. Тоа не е за 12 години, туку за највисока казна“, рече нејзиниот татко Тодор Кулаков. Тој побара и судијката да биде суспендирана додека трае истрагата за евентуална пристрасност и непрофесионалност.
Семејствата побараа од Судскиот совет јавно да одговори дали судењето било согласно закон и зошто не се земени предвид сите отежнителни околности. Исто така, предложија измени во Кривичниот законик со ново дело за „тешко дело со крајна небрежност и смртна последица“ со минимум 15 години затвор и создавање регистар за опасни сторители.
На протестот се приклучија и други семејства кои изгубиле блиски во слични несреќи. Билјана Радуловиќ, мајка на Алек, кој загина во 2021, рече дека три години чека правда и се соочува со корумпирани вештачења. Сестрата на Теодора Ристовска побара одговорност и за јавната обвинителка која побарала намалување на казната за сторителот што ја усмртил нејзината сестра.
Протестот ја отвори дебатата за недовербата во правосудниот систем и барањето за посериозен однос кон сообраќајните несреќи со смртни последици.