Volkswagen е во „конструктивни“ разговори со американската влада за царините и сака да направи повеќе инвестиции во земјата, изјави извршниот директор на германскиот производител на автомобили, Оливер Блуме, за Sueddeutsche Zeitung.
Голем број странски компании најавија нови инвестиции во САД како одговор на царините на претседателот Доналд Трамп, а германските производители на автомобили се повнимателни во врска со инвестирањето повеќе ресурси на тој пазар, објави Ројтерс.
Брендот Audi, дел од групацијата Volkswagen, која нема производствен капацитет во САД, планира да произведува некои модели во земјата.
„Досега имавме апсолутно искрени и конструктивни дискусии“, изјави Блуме за германскиот весник. „Јас бев во Вашингтон и оттогаш сме во редовен дијалог“, додаде тој.
Извори изјавија за Ројтерс претходно оваа недела дека германските производители на автомобили, вклучувајќи го и Volkswagen, се во преговори со Вашингтон за можен договор за царините, обидувајќи се да ги искористат своите најавени инвестициски и извозни обврски како средство за ублажување на потенцијален трговски удар.
Трговската војна на Трамп ги чинеше компаниите повеќе од 34 милијарди долари во изгубена продажба и повисоки трошоци, според анализата на Ројтерс.
На прашањето што предлага Блумe во разговорите насочени кон намалување на царината за увоз од 25% воведена претходно оваа година, тој рече: „Volkswagen Group сака да инвестира повеќе во Соединетите Држави. Имаме стратегија за раст“.
Блуме рече дека VW веќе вработува повеќе од 20.000 луѓе директно и повеќе од 55.000 индиректно во Соединетите Држави, а исто така посочи и инвестиција од 5,8 милијарди долари во американскиот производител на електрични возила Rivian.
„Ќе градиме врз ова со дополнителни, огромни инвестиции“, нагласи Блуме.
Ваквите инвестиции треба да се земат предвид при сите одлуки за царините, рече тој, изразувајќи надеж дека Брисел и Вашингтон ќе постигнат сеопфатен договор што ќе ги опфати сите индустрии.