Украина доби покана за учество на претстојниот самит на НАТО во Хаг, информира синоќа претседателот Володимир Зеленски. „Бевме поканети на самитот на НАТО. Мислам дека тоа е важно“, рекол тој.
Поканата до Украина била испратена за време на состанокот со генералниот секретар на НАТО, Марк Руте, во Вилнус. Зеленски не кажа дали ќе патува сам во Холандија. Самитот на земјите-членки на воениот сојуз на НАТО треба да се одржи во Хаг за помалку од три недели.
Вчера во Вилнус се одржа самит на таканаречените земји Б9, нордиските, балтичките и централноевропските членки на НАТО, кои изјавија дека се посветени на членството на Украина во западниот воен сојуз.
Украина се бори против руската инвазија со поддршка на Западот повеќе од три години.
Еден од условите што ги постави рускиот претседател Владимир Путин за прекин на војната во Украина вклучува западните лидери писмено да се обврзат да престанат со проширувањето на НАТО кон исток. Тој, исто така, бара укинување на дел од санкциите.
Спречувањето на Киев да се приклучи на НАТО е една од главните причини што ги наведува Кремљ за започнување напад врз соседна Украина.