На 22 септември ќе се одржи гала вечерта на „Франс фудбал“, каде што ќе биде доделена најпрестижната индивидуална награда во светскиот фудбал – „Златната топка“.
Иако официјалните кандидати за 69-то издание на наградата ќе бидат познати дури во август, обложувалниците веќе ги објавија своите проценки.
Апсолутен фаворит е Усман Дембеле, крилниот напаѓач на ПСЖ, на кого обложувалниците му даваат 70 проценти шанси за победа. Дембеле се истакна во незаборавна сезона – со 33 гола и 15 асистенции, тој беше клучен играч во походот на парижаните кон тројната круна. Дополнителен плус би можел да биде евентуалниот триумф на Франција во Лигата на нации во јуни.
Единствениот сериозен предизвикувач е Ламин Јамал, тинејџерската сензација на Барселона, кој постигна 18 гола и 25 асистенции оваа сезона, водејќи го каталонскиот клуб до двојната круна.
Другите кандидати се далеку зад нив – ниту еден од нив нема повеќе од седум проценти шанси да ја освои „Златната топка“ според обложувалниците.
Коефициенти за освојување на Златната топка:
Усман Дембеле 1,4
Ламин Јамал 3,75
Мохамед Салах 13
Рафиња 13
Квича Кварацхелија 15
Лаутаро Мартинез 26
Дезире Дуе 34.