Москва го предупреди Вашингтон да се воздржи од давање директна воена помош на Израел, па дури и од шпекулативни изјави на оваа тема.
Ова го изјави заменик-министерот за надворешни работи на Русија, Сергеј Рјабков, за руската новинска агенција Интерфакс.
Одговарајќи на прашање за евентуалното вклучување на САД во конфликтот на Блискиот Исток, Рјабков рече: „Соединетите Американски Држави постојано се на остриот крај на сите процеси, а да се каже дека не се мешале порано, а сега ќе се мешаат – мислам дека тоа би било неточно“, рече Рјабков.
Тој ги предупреди САД да не размислуваат за директна помош за Израел.
* Трамп размислува за заеднички напад со Израел врз Иран
* Трамп го стопирал израелскиот план за атентат врз иранскиот врховен лидер ајатолахот Хамнеи
* Кина го предупреди Трамп да не додава масло на огнот во конфликтот Иран-Израел
„Друго е прашање како тие ја разгледуваат ситуацијата со давање директна воена помош на Израел. Го предупредуваме Вашингтон дури и да не размислува за тоа. Тоа би бил потег што радикално би ја дестабилизирал целата ситуација“, нагласи Рјабков.
Во ноќта на 13 јуни, Израел започна масовен воздушен напад врз Иран. Официјалниот изговор за операцијата беше да се неутрализира работата на Техеран на неговата нуклеарна програма. Како одговор, иранската страна започна со напади врз израелска територија.