Иако е познато дека јаткастите плодови имаат бројни здравствени придобивки, помалку е познато дека некои од нив можат да помогнат и во намалувањето на крвниот притисок. Здравата исхрана игра клучна улога во одржувањето на здравјето на срцето, а одредени намирници можат да имаат изненадувачки моќен ефект. Меѓу нив, се издвојува еден јаткаст плод кој, иако мал, нуди голема хранлива вредност и поддршка за крвните садови.
Тоа се ф’стаците – јаткаст плод богат со калиум, здрави масти и влакна. „Ф’стаците се одличен избор за здравјето на срцето, особено кога се јадат несолени“, објаснува нутриционистката Андреа Матис за EatingWell. Само една порција содржи речиси 300 милиграми калиум, кој му помага на телото да го елиминира вишокот натриум и да ги опушти крвните садови, што придонесува за намалување на крвниот притисок. Покрај тоа, ф’стаците содржат минимална количина на натриум, што ги прави уште посоодветни за исхраната на луѓе со висок крвен притисок.
„Ф’стаците се богати со мононезаситени масти кои имаат корисен ефект врз холестеролот – намалувајќи го „лошиот“ LDL и зголемувајќи го „добриот“ HDL. Овие здрави масти, исто така, ја поддржуваат флексибилноста на артериите и здравата функција на клетките што ги обложуваат крвните садови, што придонесува за подобра циркулација и намалено воспаление“, објаснува нутриционистот.
Дополнително, ф’стаците се богати со антиоксиданси како што се витамин Е и лутеин, кои помагаат во борбата против хроничното воспаление поврзано со висок крвен притисок.
Иако ф’стаците можат да бидат корисен дел од исхраната, Матис ја нагласува важноста на холистичкиот пристап кон здравјето на срцето.
„Ова вклучува исхрана богата со овошје, зеленчук и интегрални житарки, редовна физичка активност, избегнување на пушење и умерен внес на алкохол. Исто така, ф’стаците лесно можат да се вклопат во вашата дневна исхрана – или како здрава ужина или како додаток во салати и други јадења“, заклучува нутриционистот.