Оскар Пјастри откри дека не го смета Џорџ Расел за кандидат за титулата во Формула 1 во 2025 година, и покрај победата на Британецот на Големата награда на Канада.
По првите десет трки од сезоната, Расел го зазема четвртото место во генералниот пласман на возачите со 136 поени и заостанување од 62 во однос на Пјастри, кој води во пласманот. Токму оваа голема разлика што ја има Расел го вади од сметките за титулата според Пјастри, кој исто така рече дека силните перформанси на Мерцедес во Монтреал не биле толку изненадувачки во однос на брзината што ја демонстрираа на „Жил Вилнев“ пред една година.
„Не мислам дека е кандидат за титулата. Мислам дека Џорџ е далеку назад. Тие беа брзи во Монтреал минатата година, мислам дека резултатот што го забележаа, требаше да биде таму и пред една година. Оваа година изгледаа многу ветувачки во многу викенди, особено во квалификациите. Конечно го донесоа тој потенцијал во трка, но останувам убеден дека нашиот тим ќе биде посилен на долг рок“, рече Пјастри.