Соединетите Американски Држави ја продолжија националната вонредна состојба во врска со Западен Балкан, која беше прогласена во 2001 година, за уште една година, почнувајќи од 26 јуни.
Извршната наредба за продолжување на вонредната состојба ја потпиша американскиот претседател Доналд Трамп на 20 мај.
Во документот објавен во американскиот Федерален регистар се наведува дека националната безбедност и надворешната политика на САД се загрозени од „дејствијата на поединци кои се вклучуваат, помагаат, поттикнуваат и поддржуваат екстремистичко насилство во Северна Македонија и на други места во Западен Балкан, како и од попречувањето на спроведувањето на Дејтонскиот договор или кршењето на Резолуцијата 1244 на Советот за безбедност на Обединетите нации“.
Во текстот на Извршната наредба, исто така, се наведува дека „дестабилизирачките дејствија, корупцијата и обидите за поткопување на суверенитетот на земјите во регионот претставуваат извонредна закана за националната безбедност и надворешната политика на Соединетите Американски Држави“.
Извршната наредба со која првпат беше прогласена вонредна состојба за Соединетите Американски Држави во врска со Западен Балкан беше прогласена на 26 јуни 2001 година, за време на мандатот на американскиот претседател Џорџ В. Буш.
На 8 јануари, пред тогашниот новоизбраниот претседател Трамп да ја преземе функцијата, поранешниот американски претседател Џозеф Бајден го потпиша Извршниот налог 14140, со кој се продолжи вонредната состојба во однос на Западен Балкан до 26 јуни оваа година.