Потпретседателот на руската државна компанија за нафтоводи „Транснефт“ почина откако наводно паднал од прозорецот на својот дом во луксузното московско предградие Рубљовка, објавија државните медиуми во петокот.
„Транснефт“ ја потврди смртта на Андреј Бадалов на 62-годишна возраст, но не коментираше за околностите. Компанијата соопшти дека тој работел во околности и за време на „тежок и стресен период“ обележан со западните санкции.
Телото на Бадалов е пронајдено под прозорецот на куќа на автопатот Рубљово-Успенское, објави државната новинска агенција ТАСС, повикувајќи се на неименуван полициски извор, како што објави независниот руски медиум The Moscow Times.
„Прелиминарната причина за смртта е самоубиство“, рече изворот, додавајќи дека е во тек прелиминарна истрага.
Бадалов ја надгледуваше дигиталната трансформација на „Транснефт“ од неговото назначување за потпретседател во јули 2021 година.
Неговата смрт е најновата во низата необјаснети смртни случаи меѓу високи раководители во енергетскиот сектор на Русија откако земјата започна целосна инвазија на Украина во февруари 2022 година.
Најмалку четири смртни случаи во 2022 година беа поврзани со државниот енергетски гигант „Газпром“, додека други вклучуваа раководители од „Новатек“ и „Лукоил“.