Рускиот министер за надворешни работи Сергеј Лавров е во официјална посета на Северна Кореја, каде што разговараше со својот севернокорејски колега Чое Сон-хуи во рамките на втората рунда стратешки дијалог меѓу двете земји. За време на серија изјави за медиумите, Лавров го нагласи длабокото стратешко партнерство меѓу Русија и Северна Кореја, ги критикуваше западните иницијативи и даде поддршка за севернокорејската нуклеарна програма, објави РИА Новости.
„Претседателот (на Русија) Владимир Путин и претседателот на Комисијата за државни работи Ким Џонг-ун се во постојан контакт, редовно разменуваат пораки и никој нема да ја запре оваа практика. Контактите ќе продолжат, времето и местото ќе бидат договорени од лидерите“, рече Лавров во Вонсан.
Лавров нагласи дека прогресивниот развој на билатералните односи придонесува за стабилноста на Корејскиот Полуостров и во поширокиот регион на Североисточна Азија.
Рускиот министер за надворешни работи оцени дека соработката со Пјонгјанг е „во согласност со интересите на двете земји“ и ги потврди плановите за обновување на морскиот сообраќај меѓу Русија и Северна Кореја, покрај веќе обновените воздушни рути меѓу Москва, Хабаровск и Пјонгјанг.
Учеството на војниците на ДНРК во Курската област покажува непобедливо братство со Русија
Рускиот министер за надворешни работи Сергеј Лавров изјави дека учеството на севернокорејските војници во борбите во рускиот Курски регион е директна потврда за „непобедливото воено братство“ меѓу двете земји.
Зборувајќи на средбата со севернокорејскиот министер за надворешни работи Чое Сон Хје во Вонсан, Лавров рече дека во претходната рунда стратешки разговори, Северна Кореја го оцени новиот билатерален договор како „темел“ на тоа братство, објави ТАСС.
„Оваа ваша проценка е практично потврдена во Курската област, каде што војниците на Корејската народна армија, заедно со руските борци, по цена на крв, па дури и живот, придонесоа за ослободувањето на тој регион од украинските нацисти“, рече Лавров.
Според извештајот на агенцијата ТАСС, тој на тој начин нагласил дека партнерството меѓу Москва и Пјонгјанг се продлабочува на терен, а не само преку политичка и стратешка соработка.