Германската федерална влада планира значителни промени во минималната саатнина што ќе влијае на милиони работници низ целата земја. Конкретно, станува збор за двостепено прилагодување на минималната саатнина, што треба да почне од јануари 2026 година.
Во моментов, минималната со закон пропишана плата во Германија е 12,82 евра на час. Според новите планови, од 1 јануари 2026 година таа плата ќе се зголеми за 1,08 евра на вкупно 13,90 евра на час. Една година подоцна, од 1 јануари 2027 година, минималната плата ќе се зголеми на 14,60 евра – речиси две евра повеќе од денес.
Според проценките на германскиот Завод за статистика, првата фаза од зголемувањето би влијаела на околу 6,6 милиони вработени, што приближно значи секој шести работник во Германија. Втората фаза од зголемувањето, една година подоцна, може да опфати дури 8,3 милиони работни места.
Оваа промена особено ќе им користи на работниците во секторите со ниски плати, како што се градежништвото и комуналните услуги, угостителството, трговијата, земјоделството и месната индустрија. Исто така, и жените и работниците во источниот дел на Германија ќе имаат значителна корист од оваа мерка.
Важната промена се однесува и на таканаречените миниџобови – работни места од мал обем, за кои нема обврска за плаќање придонеси за здравствено, пензиско и осигурување за невработеност. Во моментов „миниџобер“ може да заработи до 556 евра месечно, односно 6.672 евра годишно. Со зголемувањето на минималната плата, оваа сума автоматски ќе се зголеми: во 2026 година на 603 евра месечно, а во 2027 година на 630 евра.
Работниците што работат миниџоб и понатаму ќе имаат право на годишен одмор и заштита при работа, а во повеќето случаи се ослободени од повеќето придонеси. Сепак, тие се должни да плаќаат пензиско осигурување, освен ако не побараат изземање.
За спроведување на оваа промена, неопходно е федералната влада да го одобри предлогот поднесен од независната Комисија за минимална плата. Во комисијата членуваат претставници на работодавачите, синдикатите и експерти, а таа на секои две години предлага нова минимална плата. Се проценува дека ова зголемување ќе ги чини работодавците дополнителни 830 милиони евра низ двете фази – 400 милиони за првото зголемување и уште 430 милиони за второто.