Купувачите во Европа повеќе не можат да нарачуваат нови Tesla Model S и X според сопствените желби. Американскиот производител на електрични автомобили одлучи да престане да прима нарачки и овие некогаш водечки модели ќе се продаваат исклучиво од постојните залихи. Одлуката доаѓа откако Tesla веќе го запре производството на овие модели за пазарите со волан од десна страна, како и за Кина.
На своите европски веб-страници, Tesla го отстрани конфигураторот за нарачка на нови возила, оставајќи им на клиентите само можност да купат Модел S или X од залиха. Овој потег доаѓа откако компанијата престана да произведува верзии со волан од десна страна во 2023 година, а претходно оваа година ги прекина и во Кина.
Сега кога Европа е надвор од игра, САД и Канада остануваат единствените големи пазари каде што овие сега донекаде застарени електрични автомобили се уште се достапни. Интересно е што Tesla ги освежи Model S и Х претходно оваа година со амбиентално осветлување во повеќе бои и неколку други мали промени, но во исто време ги зголеми цените, што предизвика незадоволство кај фановите на брендот.
На пример, германската веб-страница на Tesla ги пренасочува корисниците кон список на возила на залиха за Model С, но проблемот е што во моментов нема ниту едно достапно во Германија.
Во последните неколку години, податоците за Model S и Model Х се групирани заедно со Cybertruck и камионот Semi во категоријата „Други модели“ во рамките на извештаите за производство и испорака. Во првата половина од оваа година, Tesla испорача само 23.275 возила во таа категорија, додека Model 3 и Y регистрираа речиси 700.000 испораки низ целиот свет.
Сè укажува дека Model S и Model Х се приближуваат кон крајот на своето патување и веројатно е само прашање на време кога Tesla целосно ќе ги повлече од производство.