Откако Мерцедес н се договори со Макс Верстапен, кој ќе остане во Ред Бул, продолжувањето на договорот на Џорџ Расел со „сребрените стрели“ изгледа практично сигурно.
Сега, се разбира, топката е во рацете на Британецот, кој има поголема слобода да ги диктира параметрите на договорот. Во принцип, многу од договорите во Формула 1 се потпишуваат за време на едномесечната летна пауза, но Расел изјави по финалето на Унгарското Гран При во неделата дека не очекува да види никаков развој на настаните пред да продолжи сезоната во Холандија на крајот од месецот.
„Немам за што да се грижам. Ништо нема да се случи за време на летната пауза, искрено, само сакам да се одморам и да ги наполнам батериите пред последниот дел од сезоната. Времето сè уште не притиска, па ќе се случи кога ќе се случи.“
„Сега имам 27 години, четири години сум со тимот, следната ќе ми биде петта. Ние сакаме да градиме заеднички однос, но условите мора да бидат соодветни, не сакам да брзам. Чекам 12 месеци, нема да избрзувам нешто за две недели. Затоа ние ќе говориме, кога ќе биде вистинскиот момент“, објасни тој пред Sky Sports F1.