Германските извозници ја завршија првата половина од годината, која беше обележана со царинскиот спор со Соединетите Американски Држави, со мало зголемување.
Стоки „произведено во Германија“ во вредност од 785,6 милијарди евра беа извезени во странство, пренесe ДПА.
Тоа, и покрај трговските бариери, беше за 0,6 проценти повеќе отколку од јануари до јуни 2024 година, според податоците на Федералниот завод за статистика.
Од друга страна, производителите забележаа забележителен пад на американскиот пазар, 3,1 процент, како и на подеднакво важниот кинески пазар, 13,5 проценти.
Претседателот на САД, Доналд Трамп, се обидува да ја зајакне домашната економија со повисоки царини.
Германскиот извоз во Америка ќе биде послаб на долг рок, изјави главниот економист на Комерцбанк, Јерг Кремер.
Повисоките царини би можеле „да доведат до пад на реалниот извоз во САД во следните две години за околу 20 до 25 проценти“. Во јуни, поголемиот дел од германскиот извоз сепак отиде во САД.
Сепак, вредноста на стоките во споредба со мај оваа година се намали за 2,1 процент, на 11,8 милијарди евра. Тоа беше трет последователен пад и најниска вредност од февруари 2022 година, кога изнесуваше 11,2 милијарди евра.
Во споредба со јуни минатата година, германскиот извоз во САД се намали за дури 8,4 проценти.
Глобално, во јуни беа извезени германски стоки во вредност од 130,5 милијарди евра, што е за 0,8 проценти повеќе во споредба со претходниот месец и за 2,4 проценти повеќе отколку во јуни 2024 година.
Увозот во Германија порасна уште посилно, на 115,6 милијарди евра.