Пред парламентарните избори во Молдавија во недела, на интернет се шират „дип фејк“ видеа и неосновани обвинувања против проевропската претседателка Маја Санду, а аналитичарите предупредуваат дека земјата станала „тест полигон“ на Москва за информациска војна во Европа, објави АФП.
Гласањето се смета за клучно прашање дали земјата-кандидат за ЕУ со 2,5 милиони луѓе ќе ги продлабочи своите врски со блокот или ќе се врати во Москва, од која доби независност во 1991 година.
Повеќето анкети досега сугерираат дека проевропската партија на Санду, на власт од 2021 година, е во водство, но се соочува со сериозен предизвик од опозицијата.
Санду предупреди на „невидено мешање“ од Кремљ и „инфузија од стотици милиони евра“ за купување гласови и дезинформации насочени кон гласачите.
Недели пред изборите, на социјалните медиуми се прошири „дип фејк“ видео создадено со Luma AI, во кое Санду изведува рап песна на руски јазик.
И ова е само еден елемент од дезинформациската кампања поврзана со Русија, позната како „Операција Преоптоварување“ или „Матрјошка“, според онлајн групата Antibot4Navalny.
Фото: Фејсбук/Принтскрин/Официјален профил на Маја Санду
Други неосновани обвинувања вклучуваат дека Маја Санду страда од шизофренија и дека нејзината партија ги наместила изборите.
На Telegram, меѓу тврдењата што се шират на руски јазик е дека европските лидери сакаат да ја искористат Санду, која го поддржува украинскиот претседател Володимир Зеленски, за да започнат војна во Молдавија, да воведат диктатура и да ги мобилизираат Молдавците да се борат на страната на Киев.
Неколку истраги открија кампањи за дезинформации поврзани со Русија.
Antibot4Navalny сподели детални докази со AFP дека дезинформациите од каналите на Telegram поврзани со Кремљ ги шират ангажирани инфлуенсери на TikTok и сметки слични на ботови на социјалната мрежа X.
Некои од објавите на X на англиски јазик имитираат странски медиумски организации како што се AFP или BBC и се чини дека се насочени кон меѓународна публика, вклучувајќи и милион Молдавци што живеат во странство.
Во меѓувреме, Би-Би-Си објави свои откритија оваа недела за тајна мрежа финансирана од Русија, чија цел е попречување на изборите.