Од Зоолошка градина Скопје ја информираат јавноста дека немало простор за паника во врска со неодамнешните информации за појава на животинска туберкулоза кај поединечни животни.
-Безбедноста на посетителите и грижата за животните остануваат наш врвен приоритет. Туберкулозата кај животни не е нова појава. Овој вид заболување е познат со децении, и може да се јави и во зоолошки градини и во природата, па дури и во почва, паркови и игралишта во околината каде што живееме. Ризикот за посетителите е многу низок и речиси невозможен. Преносот на туберкулоза од животни на луѓе е исклучително редок и најчесто бара долг и директен близок контакт со болни животни, нешто што е невозможно за обичните посетители, велат од ЗОО.
Оттаму додаваат дека вработените кои се во директен контакт со животните со години изминатиот период биле тестирани.
-Сите досегашни резултати се негативни, нема заразени лица меѓу персоналот. Се преземаат строги ветеринарни и санитарни мерки и постојано се врши дезинфекција во живеалиштата. Секое сомнително или заболено животно е предмет на надзор, тестирање и соодветен третман согласно меѓународните стандарди, а поставени се и дез бариери кај живеалиштата. Превентивно решивме во наредниот период да го изолираме и Бејби ЗОО, катче кое секако во наредниот период ќе мора поради ниските престоечки температури да се затвори за јавност.
Посетителите се движат по безбедни патеки и немаат близок контакт со животните. Контролата на здравјето на животните и на вработените е континуирана и под надзор на надлежните институции. Случаи на животинска туберкулоза се регистрирани и во други зоолошки градини низ светот, но тоа никогаш не резултирало со ризик за јавноста, стои во соопштението од ЗОО Скопје.
Советникот во Советот на Град Скопје од ВМРО-ДПМНЕ, Стефан Кирков, пред два дена преку објава на социјалните мрежи предупреди на сериозна состојба во Зоолошката градина во Скопје, наведувајќи дека причина за смртта на неколку животни е туберкулоза.
-Неодамна починаа Лами за кој се установи дека биле заболени од туберколуза, исто така пред неколку дена почина и младо мајмунче од видот Гибон за кој исто така резултатите на туберкулоза беа позитивни и тоа е причината за неговата смрт.
За трагедијата да биде уште поголема пред десетина дена почина и бизонот за кој денес добив официјални резултати дека истиот бил болен од туберкулоза, ноазен тип за кој ако малку се информираме ќе видиме дека е пренослив од животно на животно и од човек на човек.Резултатите се добиени од патолошките наоди на погинатите животни од Ветеринарниот факултет, Ветеринарниот институт и од Агенцијата за храна и ветерина, информира Кирков.
Кирков тврди дека во скопската Зоолошка градина постои туберколоза, вели состојбата е алармантна