Британската полиција потврди дека нападот пред синагогата во англискиот град Манчестер, каде што беа убиени две лица, а тројца беа повредени, се третира како терористички напад.
Напаѓачот беше застрелан од локалната полиција само 7 минути откако беше пријавен инцидентот пред синагогата. Две лица се уапсени. Тројцата повредени се во критична состојба.
Премиерот Кир Стармер, кој се врати од Копенхаген, одржа итен состанок на кризниот комитет COBRA. Во изјавата потоа, Стармер рече дека „омразата повторно се зголемува во Велика Британија и мора да биде поразена“.
Во директно обраќање до британските Евреи, тој рече дека ќе направи „сè што е во моја моќ за да се осигура дека тие ја имаат безбедноста што ја заслужуваат“.
Израелскиот министер за надворешни работи, Гидеон Саар, беше многу критичен кон британската влада, велејќи: „Вистината мора да се каже: очигледното и неконтролирано антисемитско и антиизраелско поттикнување, како и повиците за поддршка на тероризмот, неодамна станаа широко распространета појава на улиците на Лондон, во градовите низ Велика Британија и на универзитетските кампуси“.
Во меѓувреме, полицијата соопшти дека уредот што напаѓачот го носел околу половината „не бил функционален“.