Една година по трагедијата во српскиот град Нови Сад, каде што на 1 ноември 2024 година загинаа 16 лица кога се урна бетонска настрешница на железничката станица, а едно лице беше тешко повредено, студентите испратија порака до властите.
„До утре и до секој ден потоа, додека вистината не победи“, напишаа студентите на транспарент што го спуштија од Петроварадинската тврдина, која се наоѓа на десниот брег на реката Дунав во Нови Сад.
Србите од дијаспората ја одбележаа годишнината во над 60 градови низ целиот свет, а студентите им се заблагодарија од Нови Сад.
Комеморативни собири по повод трагедијата се одржаа во српската престолнина Белград и во најголемиот град во источна и јужна Србија, Ниш. Оние кои не можеа да патуваат во Нови Сад имаа можност да оддадат почит таму.
Мајката на една од 16-те жртви објави дека штрајкува со глад во знак на протест против недостатокот на пресуди и гонења за корупција во случајот со уривањето на кровот на железничката станица.
Судењето сè уште не е започнато, а истрагата е во тек. Првото рочиште на поранешниот министер за транспорт Горан Весиќ, кој поднесе оставка неколку дена по трагедијата, но изјави дека не се чувствува виновен за она што се случило, е закажано за средината на ноември.
Според српското Министерство за внатрешни работи, вчера во Нови Сад имало околу 39.000 луѓе, а според агенцијата Франс-прес, присутни биле најмалку 100.000 луѓе.
Со денови, студенти и граѓани од различни делови на Србија пешачеле до Нови Сад.
Најдолгата рута, 420 км, што студентите ја поминале до Нови Сад била од градот Нови Пазар, населен со Бошњаци (југозападна Србија).
Комеморацијата во Нови Сад една година подоцна е кулминација на антивладините протести предводени од студентите, кои започнаа по трагедијата.
Кон крајот на ноември, студентите блокираа повеќе од 60 универзитети низ целата земја, а протестите добија на интензитет.
Демонстрантите ги обвинуваат корупцијата и небрежноста за трагедијата во Нови Сад. Нивните барања за транспарентна истрага и одговорност прераснаа во мај во повици за предвремени избори, кои претседателот Александар Вучиќ одби да ги распише.
Протестите првично беа претежно мирни, но во текот на летото избувнаа судири меѓу полицијата и демонстрантите, кои ја обвинуваат полицијата за бруталност и прекумерна употреба на сила.