Шпанскиот премиер Педро Санчез ја отфрли можноста за одржување предвремени избори и потврди дека ќе го заврши својот мандат, и покрај политичките тешкотии и раскинувањето со сепаратистичката каталонска партија Хунтс, која ја повлече поддршката за неговата малцинска влада.
„Ќе се кандидирам повторно за реизбор во 2027 година“, изјави тој за „Ел Паис“.
Лидерот на шпанските социјалисти призна дека е сложена ситуацијата во парламентот, но нагласи дека оваа ситуација може да се помири со „добро управување“.
Тој додаде дека резултатите на владата во изминатите седум години биле „добри во економска и социјална смисла“. На прашањето за можни предвремени избори, Санчез одговори: „Не сме во таква ситуација“, нагласувајќи дека неговата влада го исполнила политичкиот договор со партиите, како што е Хунтс, кои ја поддржаа неговата влада во ноември 2023 година.