Српскиот министер за надворешни работи, Марко Ѓуриќ, смета дека земјата не треба да заостанува зад соседните земји во процесот на европска интеграција, објави агенцијата ТАНЈУГ.
Ѓуриќ, кој вечерва во Брисел ќе учествува на неформална вечера за министрите за надворешни работи од ЕУ и земјите партнерки од Западен Балкан, организирана од високата претставничка на ЕУ за надворешни работи и безбедносна политика, Каја Калас, нагласи дека Србија, како централна земја на Балканскиот Полуостров, мора да го заземе своето заслужено место на европската маса.
„Нашата цел е јасно да ѝ претставиме на европската јавност, на највисоките претставници на Европската Унија, какви реформски чекори презеде Србија во претходните недели и месеци и со каква нова енергија пристапуваме кон процесот на европска интеграција“, рече Ѓуриќ.
Тој додаде дека српското општество треба да се фокусира на нешто позитивно, на нешто што ќе донесе опиплива, посилна врска со континентот на кој се наоѓа Србија, со заедницата на народи и земји со кои врши над 62 проценти од економската размена, а кога на ова ќе се додаде и регионот, тоа се над 77 проценти од економската размена.
„Ова не е само можност за проевропски наратив. Ова е можност за конкретни договори за забрзување на европската интеграција на Србија“, рече српскиот министер за надворешни работи, цитиран од ТАНЈУГ.
Србија е официјален кандидат за членство во ЕУ од 2012 година.
Од декември 2021 година, земјата не отворила нов кластер во процесот на пристапување, бидејќи одбива да ја синхронизира својата надворешна политика со ЕУ и да воведе санкции врз Руската Федерација поради војната во Украина.
На почетокот на ноември, српскиот претседател Александар Вучиќ објави дека очекува Србија да го отвори Кластерот 3 на 17 декември.