Министерот за внатрешни работи на Република Србија, Ивица Дачиќ, денес, на маргините на 93-то Генерално собрание на Интерпол во Маракеш, одржал средба со директорот на Бирото за јавна безбедност, Александар Јанев.
Двете страни се согласиле дека постои одлична полициска соработка меѓу Република Србија и Република Македонија. Посебен акцент е ставен на успешната соработка во клучните области на борбата против нерегуларните миграции, организираниот криминал и тероризмот.
На средбата била потврдена целосна посветеност на понатамошна соработка и била изразена надеж дека заедничките сили на двете земји ефикасно ќе одговорат на сите актуелни безбедносни предизвици во регионот.
View this post on Instagram
Претходно, Јанев на маргините на Генералното собрание на Интерпол, соопшти дека Македонската полиција добива пристап до најсовремени програми за обука, експертски ресурси, иновативни методолошки алатки и заеднички проекти за борба против транснационалниот криминал.
-Ова членство ќе придонесе и за подобра размена на знаење, унапредување на професионалните стандарди и развој на нови генерации полициски службеници со глобални компетенции. Изразуваме благодарност до ИНТЕРПОЛ за довербата и партнерството со што се потврдува посветеноста кон продлабочување на меѓународната полициска соработка, заштитата на безбедноста на граѓаните и активниот придонес кон глобалната борба против организираниот криминал, истакна, меѓу другото, првиот човек на БЈБ.