Амбасадорот на Европската Унија во Македонија, Михалис Рокас, денес го посети градот Кочани, соопшти Делегацијата на ЕУ во Скопјe. За време на неговата посета, тој им оддаде почит на жртвите од пожарот во Кочани на 16 март оваа година, во кој загинаа 63 лица, а потоа се сретна со новоформираните локални власти, како и со претставници на градската заедница.
Посетата на Рокас започна на градските гробишта, каде што положи цвеќе во спомен на 63-те жртви од пожарот во дискотеката „Пулс“ на 16 март 2025 година, а попладне се сретна и со здружението на родители на жртвите од трагедијата, наречено „16 март 2025 – Кочани“, како и со претставници на преживеаните од пожарот.
Рокас се сретна и со новоизбраниот градоначалник на Кочани, Владко Грозданов, при што разговорот се фокусираше на локалните приоритети, потребите на заедницата и континуираната поддршка на ЕУ за развојот на општината. Амбасадорот на ЕУ разговараше и со претставници на Општинскиот совет на Кочани, разменувајќи мислења за јавните услуги, локалната самоуправа и соработката со иницијативите финансирани од ЕУ.
„Посетата истакна широк спектар на иницијативи поддржани од ЕУ планирани за Кочани и источниот регион на земјата. Тие вклучуваат напори за подобрување на управувањето со животната средина, модернизација на медицинската опрема во клучните области на здравствената заштита и поддршка за енергетски ефикасна реконструкција на јавните згради. Исто така, се работи на долгорочен пристап кон користењето на термалните води на Кочани“, се вели во соопштението.
Ангажманот на младите во градот ќе биде зајакнат преку новата Куќа на Европа во Кочани, која ќе создаде простор за креативност, учење и проекти во заедницата, се наведува понатаму во соопштението. Локалното граѓанско општество и независните медиуми ќе имаат пристап до нови можности за финансирање, додека подобрувањето на безбедноста на работното место останува важен приоритет за идната поддршка од ЕУ. Се очекува понатамошна соработка преку претстојните експертски работилници за квалитетот на здравствената заштита и иницијативата „Тим Европа“ предводена од Романија.
„Кочани покажа сила во година обележана со катастрофални загуби. Денес, дојдовме пред сè да ја слушнеме и поддржиме заедницата. Посветеноста на семејствата, посветеноста на локалните институции и енергијата на младите луѓе тука се јасни. Европската Унија ќе остане сигурен партнер додека Кочани продолжува да се опоравува и да се движи напред“, се цитира во соопштението амбасадорот на ЕУ во Македонија.