Унгарскиот премиер Виктор Орбан ќе отпатува во Москва на разговори за дополнителни испораки на природен гас за зимата и следната година, објави Ројтерс. Портпаролот на Кремљ потврди дека средбата меѓу рускиот претседател Владимир Путин и Орбан ќе се одржи подоцна денес (28 ноември), објави ТАСС.
Во интервју, унгарскиот премиер истакна дека разговорите се дел од неговите обиди да ја обезбеди енергетската безбедност на Унгарија.
На почетокот на ноември, Орбан разговараше со американскиот претседател Доналд Трамп и се согласи на едногодишно откажување од санкциите против рускиот нафтен сектор. По средбата, унгарскиот премиер објасни дека неговата земја ќе може да продолжи да купува нафта преку гасоводот „Дружба“ и гас преку гасоводот „Турски тек“. Белата куќа прецизираше дека оваа дозвола е за една година.
Унгарското Министерство за надворешни работи објави дека од почетокот на годината, земјата купила над 7 милијарди кубни метри природен гас од Русија и 8,5 милиони тони сурова нафта.
Во услови на напори на другите земји од ЕУ да ја намалат својата зависност од Русија, Будимпешта ја зголемува. Според Блумберг, за време на воените години, Унгарија веќе купувала речиси целата нафта што ја троши од Русија. Виктор Орбан ги нарекува овие резерви „витални“ и без алтернатива, иако статистиката покажува дека во 2021 година Русија обезбедила околу 60% од нафтата што ја троши земјата.
Во замена за отстапувањето, Унгарија потпиша и неколку договори со САД за снабдување со течен гас и нуклеарно гориво од „Вестингхаус“.
Тешко дека ќе можеме да избегнеме да зборуваме за мировни преговори, изјави и Виктор Орбан пред средбата со Владимир Путин.
Во меѓувреме, украинските антикорупциски власти го претресуваат домот на шефот на кабинетот на претседателот, Андриј Јермак. Тој е „десна рака“ на Володимир Зеленски и ги води преговорите со Соединетите Американски Држави за развој на мировен план за Украина. Специјализираното обвинителство за борба против корупција објави дека операцијата е тековен случај.
Jeрмак потврди на социјалните мрежи дека неговиот стан во владиниот округ на Киев бил претресен и дека соработува со властите.
Во изминатиот месец, Украина беше потресена од голем корупциски скандал во енергетскиот сектор. Податоците од Националното биро за борба против корупцијата покажуваат дека било побарано мито од подизведувачи на операторот на нуклеарната централа во земјата, Енергодар.
Веројатната вредност на овa мито е околу 100 милиони долари. Украинскиот претседател побара оставки од двајцата министри – за енергетика и за правда, чии имиња беа вмешани во случајот.