Поранешниот портпарол на ВМРО-ДПМНЕ, Димса Арсовски ги демантираше денешните тврдења на СДСМ и негираше било каква поврзаност со фирмата со двајца вработени, основана лани, а веќе добила тендери во вредност од речиси 9 милиони евра.
„Денеска СДСМ повторно покажа и докажа дека влијанието од заевизмот и многуте лиценци поделени за одгледување марихуана, сеуште владеат во СДСМ. Некое момче во залез на кариера после сериозен пораз на избори, нарекувајќи се втор човек во партијата, јавно се обидел да ме поврзе со некаков си тендер од неколку милиони евра, само и само затоа што сопственикот носел исто презиме како моето.
За да биде детално јасно, ниту го познавам човекот кој е сопственик на фирмата, ниту сум го сретнал, ниту знам како изгледа, ниту ми е роднина по било која основа. Единствено што е исто е презимето. Немам никаква врска со никаков тендер, ниту пак сум имал било каква врска со државни тендери“, посочува Арсовски во јавна објава.
Иако во прашална форма, додава екс-портпаролот на ВМРО-ДПМНЕ, моето име и презиме беше споменато на пресот на СДСМ, тенденциозно со намера да ме вовлечат во нивни креатури и да ги манипулираат граѓаните и јавноста, па затоа јавно барам извинување од СДСМ, ако им остана малце достоинство.
„За разлика од нив, секој мој прес каде што било изнесено било што како информација, било точно и потврдено, а не како нивниве лаги и измислици. Знам дека сеуште ги боли што ја изнесував секојдневно вистината за нивниот криминал. Избори и доверба кај народот не се добиваат со тоа што ќе измислувате непостоечки случаеви и интриги за луѓе од ВМРО-ДПМНЕ, туку со напорна работа, реформи и програма. Така победува ВМРО-ДПМНЕ на изборите, со чесно и домаќинско работење, а криминал доколку некаде има, институциите си ја вршат работата и тоа се гледа“, укажа Арсовска преку социјалните мрежи.
СДСМ со прес конференција која што претходно беше најавена, денеска почна да ги открива, како што се вели во партискоото соопштение, „скандалите за криминалот на Владата на Мицкоски“.
Генералниот секретар на СДСМ, Александар Саша Димитријевиќ, изјави дека станува збор за првиот од серијата скандали на Владата. Притоа, посочи дека фирмата „Дигитал оне“, формирана на крај на август лани, со само двајца работници за една година има добиено тенеди од скоро девет милиони евра, народни пари. Сите овие тендери биле со владини и државни институции во период од мај 2025 до денес ноември 2025.
Тој посочи дека фирмата била основана од „извесен Кристијан Арсовски“ и има само двајца вработени. Од шест државни тендери, дури четири биле со Генералниот секретаријат на Владата. Последниот договор е рамковна спогодба за софтверски лиценци за виртуелна платформа во вредност од 8 милиони евра, рече тој.
„И секако, едно од прашањата е дали Кристијан е во роднински врски со поранешниот портпарол на ДПМНЕ, Димса Арсовски? Повикуваме Јавното обвинителство, Финансиската полиција и ДКСК веднаш да регираат, да отворат истрага. Овој скандал има и други сомнителни аспекти за кои ќе продолжиме да говориме“, кажа Димитријевиќ на прес-конференција.