Барањето на сите релевантни здруженија на пензионери, вклучувајќи го и Сојузот на здруженија на пензионери во Република Македонија, беа во насока на линеарно зголемување на пензиите и Владата тоа го испочитува, но конечната оцена за уставноста на мерката треба да ја даде Уставниот суд, вели директорот на Фондот за пензиско и инвалидско осигурување (ПИОМ), Никола Мемов.
Во интервју за РСЕ, Мемов посочува дека до Уставниот суд се поднесени две граѓански иницијативи и дека во тек е јавна расправа.
Прашан зошто пензионерите што живеат во странство не добија линеарно покачување, Мемов рече дека аргументацијата била дека тие не ги чувствуваат ценовните шокови во земјата.
-Аргументацијата за тоа покачување, односно за непокачување на пензиите на македонски граѓани коишто пензиите ги примаат во странство се следниве: тие се околу 10.000 пензионери коишто живеат низ светот и пензијата ја примаат во странски банки, односно во странски држави. Аргументацијата во Собранието беше дека тие не ги чувствуваат ценовните шокови и инфлацијата во Македонија, кажа директорот на ПИОМ.